Россиядән 14 яшьлек шахматчы Давид Ахмедов шахмат короле Магнус Карлсенны җиңде

Россиядән 14 яшьлек шахматчы Давид Ахмедов шахмат буенча дөнья чемпионы, «шахмат короле» титулына ия булган норвегияле Магнус Карлсенны онлайн-турнирда җиңде. РЕН ТВ басмасына биргән интервьюсында Давид Ахмедов әлеге ярышта ниләр кичерүе турында сөйләгән.

Партия 56нчы йөрештә төгәлләнә – Карлсен түзә алмый һәм бирешә. 14 яшьлек Давид сүзләренчә, ул бу матчка әзерләнмәгән һәм үзенә мондый шанс эләгер дип уйламаган.

«Бик рәхәт булды. Партия дәвамында киеренке халәттә булдым. Ул бирешкәч, өстән тау төшкәндәй булды», – дип сөйләгән Давид.

«Авыр булды. Концентрацияне югалтырга һич тә ярамый, юкса, ул һөҗүм итә яки башка берәр нәрсә эшли. Кумирым – һичшиксез Магнус Карлсен, чөнки ул күп еллар дәвамында искиткеч уен күрсәтә. Бары тик башкаларга караганда бер баскычка югарырак. Аның уеннарын бик күп карыйм», – дип сөйләгән яшь шахматчы.

Шундук диярлек «Карлсенның яшь көндәше барлыкка килде» дигән сүзләр дә таралды. Беренчедән, оттыру аның очколарын кисте, чөнки Давид, шау-шулы җиңүеннән соң, турнир позициясенең 84нче урынында гына әле. Тик ул «Халыкара шахмат федерациясе мастеры» исемен яңа гына алды һәм биеклеккә таба юлын башлады гына, ә планнарында – чемпион титулы.